English
English

قبرص الساحلية

ايا نابا من المدن الساحلية الموسمية في قبرص الي بتكون شغالة في شهورة الصيف فقط، زي الساحل الشمالي عندنا في مصر. مشهورة جدا في محيط البحر المتوسط بالحفلات والمزيكا والرقص صبح وليل زي جزيرة ابيزا الاسبانية. فنادق الاقامة فيها تعتبر الاغلى في قبرص كلها. مقصد سياحي للسياح الروس والانجليز، خاصة الشباب الي بيحبوا النايت لايف. الشواطئ بتاعتها هي الاحلى في قبرص كلها علشان white sand وعلشان فيها Lagoons كتيرة حلوة وكمان Cliffs عالية. النهاردة هوريكم اشهر شاطئ فيها والي اسمه Nissi Beach. سبب شهرته انه لاجون كبير وقدامه جزيرة صغيرة تقدر تروحها مشي على رجليك وكمان قفزة Cliff سهلة والعاب مائية كتيرة واسعارها معقولة، والاهم بقى beach party الي موجودة اغلب ايام الاسبوع.

دخول الشاطئ مجاني. بالرغم من ان فيه فتادق كتيرة، الا انك تقدر تقعد امام شاطئ اي فندق انت عايزه. تاجير سرير بحر ٢ يورو وشمسة ٢ يورو. اغلب الشباب بيروح بالفوطة بتاعته ويقعد على الرملة على طول. الشاطئ بطوله مليان مطاعم غالية ورخيصة. هتلاقي الغذاء ممكن من اول ٥ او ١٠ يورو. المشروبات كمان هتلاقيها من ٣ الى ٥ يورو او اكتر. لو عايز تاخد اكلك وشربك كمان وانت رايح، خدهم، محدش هيقولك حاجة. البيتش عليه خدمات نضيفة وحمامات وشاورز (الدقيقة بيورو) وغرف تغيير ملابس.

اجروا بدال الي فيه زحليقة ده الساعة ١٥ يورو. حلو جدا وتقدروا تلفوا بيه في البحر وتتصوروا صور حلوة. فيه كمان كاياك سعره رخيص. الالعاب الي فيها مواتير ولانشات بقى هتكون اغلى اكيد. لازم تروحوا الجزيرة العالية الي قدام البيتش. المشاية الرملية الي بتوصل بين الجزيرة والشاطئ بتظهر وتختفي بسبب المد والجذر. هتلاقوا كمان حفلات المزيكا شغالة على البحر كل يوم ودخولها ببلاش.

لو انت ساكن في فندق في مدينة ايانابا، تقدر تروح الشاطئ بالاتوبيس العام بتذكرة تقريبا ٢ يورو من وسط البلد. لو انت ساكن في مدينة ليماسول او لارناكا، ممكن تروح Nissi Beach بالاتوبيس intercity الى لارناكا الاول وبعد كدة اتوبيس تاني الى ايانابا. تذكرة الاتوبيس intercity لليوم كله ب١٥ يورو. بس خد بالك من مواعيد رجوعه علشان بيقفل بدري. كل حاجة عن اتوبيسات قبرص وجداولها، سواء داخل المدن او بينها، موجودة على موقع cyprusbybus.

ايانابا بالليل بقى حاجة تانية خالص، استنوا البوست الجاي.

مين راح Nissi Beach قبل كدة او راح شواطئ تاني حلوة في قبرص يقولنا عليها؟


التعليقات

مقالات أخري