English
English

الطيران الاسيوي

الواحد كل يوم بيشوف حاجات جديدة والله.... النهاردة اتعلمت ٥ حاجات جديدة لما تكون مسافر طيران في اسيا وحبيت احكي ليكم سريعا:

١-أثناء سفري في اسيا الشهرين الي فاتوا، كل مرة كنت بطلع اي طيارة بشنطة هاند باج وزنها تقريبا ١٠ كيلو وشنطة صغيرة وزنها ٧ كليو لان فيها اللابتوب والكاميرات. ركبت بيهم رحلات طيران كثير مع خطوط طيران مختلف، لا حد سأل على وزن ولا حاجة:

كوالالمبور - لاوس - Air Asia

لاوس - فيتنام - Lao Airlines

كوالالمبور - بالي - Batik Airlines

وانا بدور على تذكرة رجوع الى كوالالمبور مرة تانية من بالي، قولت قشطة معايا هاند باج بس، اما اشتري تذكرة رخيصة من Air Asia، لانها من غير شنطة كبيرة. لكن اكتشفت النهاردة الصبح في مطار بالي ان Air Asia في بالي كانوا بيركزوا اوي في موضوع وزن شنط الهاند باج الي بتطلع بيها الطيارة. اتفاجئت ان الوزن المسموح للشنطة الهاند باج وشنطة اللابتوب مع بعض لا يزيد عن ٧ كيلو - كانت مفاجأة بصراحة وكنت مضطر ادفع ٢٤ يورو زيادة علشان اشحن الشنطة في الطيارة. يعني لو كنت اشتريت تذكرة اغلى ١٠ يورو من شركة تانية كانت هتكون اوفر (شركات طيران اقتصادي كتير في آسيا بتسمح انك تشحن شنطة في الطيارة وزنها من ١٥ ل ٢٠ كيلو - زي Batik & Malindo).

من الواضح ان مش كل موظفين Air Asia زي بعض. في ناس بتركز في الوزن والحجم وتغرمنا فلوس.

٢ - الباور بانك يا جماعة وانتم مسافرين لازم يكون في شنطة الهاند باج وما ينفعش يتشحن في الشنطة الي داخلة الطيارة. لو نسيته فيها هيطلعوا شنطتك ويندهوا على اسمك علشان تاخده اكنهم لقوا قنبلة.

مقدار الطاقة او الفولت اللي طالعة من الباور بانك ليها سقف في اندونيسيا لا يتعدى ال٣٢ الف امبير وفي تايلاند لا يتعدى ال ٥٠ الف امبير. بيتم فحص الباور بانج بتاعك قبل ركوب الطيارة ويتم مصادرته اذا كان اكتر من الأرقام المسموحة. اتأكد من المعلومة دي في اي بلد مسافرها علشان واضح انها بتختلف من بلد للتانية. حد اتصادر منه باور بانك قبل كدة وهو مسافر علشان كان طاقته كبيرة؟

٣ - الجماعة الي بيحبوا التصوير وبيسافروا بالتراي بود Tripod - ممنوع يطلع معاك الطيارة في الهاند باج (قوانين اندونيسيا) - ولازم يتشحن في الشنطة الي داخلة الطيارة. بعد ما شحنت شنطتي ودفع فلوسها، رجعت للكاونتر واخدوه مني ولزقوا عليه ورقة عليها اسمي علشان استلمه هناك. الحمدلله شحنه كام ببلاش. حد سافر بالتراي بود قبل كدة وطلع معاه الطيارة بدون مشاكل؟

٤ - شركة Air Asia لا تقدم وجبات او سناكس مجانية على الطيارة، لكن متاح انك تشتري وجبات من الموقع بتاعهم وانت بتشتري تذكرتك. طلبت اونلاين لازانيا ومعاها قهوة هدية وسعرهم تقريبا ٢ يورو، ارخص ٥٠% من السعر لو اشتريت وانت على الطيارة. ثانيا لو انت في المطار وعايز تاكل او تشرب اي حاجة قبل السفر، هتدفع اكتر من كدة بكتير في كل الكافيهات الي حول بوابات السفر. اشتروا وجبة رخيصة خصوصا في رحلة طويلة زي دي ٣ ساعات او خدوا معاكم ساندوتشات بقى.

٥ - وانا في المطار كان فاضل معايا ١٥٠ الف روبية إندونيسي (١٠ يورو تقريبا) وحبيت اشتري هدايا بسيطة علشان اخلصهم قبل ما اسافر. فضلت ادور على حاجات بالفلوس دي بالزبط لكن مالقتش نفس القيمة بالزبط ولكن الي اختارته كان قيمته ٢٢٠ الف روبية. اكتشفت وانا عند الكاشير اني ممكن ادفع كاش وفيزا مع بعض في نفس الفاتورة. دي فكرة كويسة برضو انك تدفع كاش الاول وبعدين المبلغ المتبقي من الحساب بالفيزا، يبقى ضمنت تخلص الفلوس كلها. امنعواوالضحك هاهاهاهاه... والله ما كنت اعرف

- لو معاكم فلوس محلية كتير يوم السفر، مش لازم تصرفوها كلها قبلها بيوم او في المطار. مكاتب الصرافة في المطار ممكن تاخدها منك كلها (حتى العملات الفضية) وتديلك دولار او يورو او عملة آسيوية تانية لو انت عايز. بس مش اسعار العملة في المطار وحشة؟ ايوة هي اكيد مش الافضل، لكن الخسارة نسبيا بسيطة اوي. لو هتغير مئات الدولارت ماشي، لكن لو فلوس قليلة بسيطة.

حد حاول يخلص او يغير الفلوس المحلية الي معاه قبل ما يسافر؟

حد عنده دروس مستفادة جديدة في اي رحلات طيران داخلية في آسيا او اوروبا؟


التعليقات

مقالات أخري