English
English

الهجرة إلى ألبانيا

هربان بقالك قد ايه يا عبد العزيز؟

حوالي سنتين ومش عارف اوصل اي مكان

اثناء زيارتي لمسجد كبير في مدينة دوريس

جالي مكالمة تليفون من مصر وصوتي كان عالي حبتين

سمع صوتي عبد العزيز، المصري الي متطوع في نضافة الجامع

مصري ذو لحية خفيفة، يبدوا عليه البساطة والزهد كدة

متطوع للعمل في نضافة المسجد علشان ياكل وينام

جالي وسلم عليا وسألني بقالك قد ايه ورايح فين وازاي وكدة

قولتله انا جاي سياحة … استغرب اوي، اغلب المصريين الي بيقابلهم جايين هنا هربانيين و بيدروا على شغل او هروب حتة تانية

قولتله طمني اخبار الشغل هنا ايه؟ احكي لي قصتك سريعا (رفض طبعا اصوره فيديو او صورة عادية) وبدأ يحكي مأساته الي بقالها سنتين

سافر اولا من مصر الى الكويت بتأشيرة زيارة او عمل، وبعدين منها سافر الى قطر ترانزيت علشان يسافر ايران … وقبلها كان دافع 2000 يورو علشان يهربوه من ايران الى تركيا عبر الجبال …. وحكالي تفاصيل المغامرة ازاي وصولوا الحدود الايرانية ومشيوا في الجبال كيلومترات كتير علشان يوصلوا تركيا. جنسيات كتيرة اوي كانت في قافلة التهريب دي. كل واحد وصل تركيا جاله حد يستلمه علشان يوديه اسطنبول. وصل اخيرا ولقى شغل بالعافية في مصنع ملابس ، اشتغل وسكن في المكان لفترة قصيرة وبعدين جت الكورورنا وكل حاجة قفلت بعد كام شهر. فضلت الدنيا مقفلة معاه شوية ودور على مهرب يوديه اليونان. دفع 2000 يورو تانيين علشان يتهرب على اليونان وبالفعل وصلها. اوروبا بقى واليورو. اتبهدل شويتين تلاتة ومش لاقي شغل عدل ولا نفع في اي مكان. بعد كام شهر من المحاولات في سالونيكي واثينا، قرر يدفع فلوس تاني (1000 او 2000 يورو) علشان يهرب على البانيا …. صعقت!!! قولتله سايب تركيا واليونان علشان تهرب وتيجي البانيا الافقر منهم عشرات المرات

ابتسم كده وعينيه فيها لمعة المنتصر ….. “لا لا ، انا هنا شوية بس لحد ما الاقي طريقة اهرب على ايطاليا” …. قولتله يخرب بيتك دا انت جايبها من ورا اوي ( زي جايبها من تحت اوي كدة هاهاها ) علشان تروح ايطاليا، اوعى تركب مركب وتلاقي نفسك في راس البر زي حزلقوم هاهاهاها “ مكنتش عارف اضحك بصراحة ولا ازعل

دفع حوالي 100 الف جنية تهريب من بلد للتانية للتالتة للرابعة وفي الاخر لسه بيطارد حلم الهجرة لاوروبا. طبعا محدش فينا مكانه وعارف ظروفه علشان يحكم عليه او يقوله افتحلك مشروع بال100 الف جنية دي، بس اهو بقى، قصة كفاحه قد تكلل بالوصول الى ايطاليا ويلاقي حياة كريمة بيجري وراها في التراب الاوروبي

وقد يفضل يهرب من بلد للتانية بحثا عن الافضل وفي الاخر هيلاقي نفسه اتقبض عليه واترحل مصر تاني

الي عنده اي قصص هجرة غير شرعية ناجحة او فاشلة، ياريت يشاركها معايا في رسالة وطبعا السرية مكفولة للجميع. احب اسمع عن القصص كلها علشان لو في دروس مستفادة اقدر اشاركها مع الجميع

لكن الي متأكد منه بكل تأكيد، ان البانيا بلد فقيرة فعلا جدا ولا تصلح للهجرة خالص. الالبان نفسهم بيهربوا منها يشتغلوا في اوروبا، فمحدش يفتكر انها بلد اوروبية وفيها فرص عمل وكدة. هي بلد حلوة للسفو الفسحة بس.


التعليقات

مقالات أخري