English
English

مرض البرانويا

حد سمع قبل كدة عن مرض البرانويا؟؟

تخيل كان في دكتاتور مهووس معيش البلد بتاعته كلها في برانويا (الهوس والخوف المبالغ فيه من اوهام) ان بلدهم هيتم غزوها من الاعداء المتربصين حواليها في كل اتجاه.

الدكتاتور الالباني “انور خوجة” هتسمعوا اسمه كتير في البانيا لانه حكمها اكتر من 40 سنة وعمل فيها عمايل ما تتوصفش. خليني اقولكم النهاردة على واحدة من القصص المجنونة الي عملها في البانيا ال وهي بناء عشرات الالف من البانكرز bankers - المخابئ للجنود والشعب علشان يستخبوا فيها من الاعداء ومنها يقدروا يدافعوا عن المدينة

تفتكروا عمل كام واحدة؟؟؟

175 الف

وبعض الروايات بتقول

700 الف

بعضها كان صغير جدا ومكون من حجرة واحدة تحت الارض وتتسع لشخص او اتنين وبعضها ضخم لدرجة انه كان 5 ادوار تحت الارض وفيها 100 غرفة

بعضها اتهد بعد انهيار الشيوعية، بعضها اتحول لمخازن واتنين مهمين اتحولوا لمتاحف Bunkers 1 & Bunkers 2

المتحفين تحت الارض مكونين من عشرات الغرف الي بتحكي عن الحقبة الشيوعية الدكتاتورية السوداء بتاعت البانيا. المتحف رقم 2 موجود في قلب العاصمة تيرانا ومكون من دور واحد و24 غرفة وكان المخبأ الرئيسي لوزارة الداخلية الي بجواره على طول وبيحكي عن اهوال وزارة الداخلية بتاعت الدكتاتور انور خوجة واساليبها في التحقيقات والتعذيب والقتل والمعتقلات والكثير من ماضيها في الكذب والتلفيق والتصدي لاعداء الدولة الشيوعية الدكتاتورية في البانيا المغلقة سياسيا واقتصاديا مع اغلب دول العالم.

المتحف رقم 1 موجود عند جبل الدايتي خارج العاصمة تيرانا (هزوره المرة الجاية ان شاء الله) ومكون من 5 اداور و100 غرفة ومليان احداث وشخصيات وحقائق عن النظام الشمولي الشيوعي الي حكم البانيا اكتر من 40 سنة وسقط سنة 1991. التذكرة حوالي 500 ليك (5 دولار) ولو عايز مرشد بيكون ب25 دولار تانيين.

انصحكم جدا بدخول المتاحف دي او احدهما. تاريخ البلاد السياسي بيرسم شكل الدولة الحالي والمستقبلي وبيفسر اشياء كتير عايشين فيها. وبيورينا قد ايه شعوب كتير عانت كتير علشان تاخد حريتها واستقلالها لانشاء مجتمعات ديموقراطية حديثة.


التعليقات

مقالات أخري