English
English

اسهل وسيلة نقل في قبرص

علشان قبرص جزيرة صغيرة وتعداد سكانها قليل، وسائل المواصلات العامة المتوفرة داخل المدن او بينها تنحصر في الاتوبيسات. ليهم خطوط سير ومواعيد محدودة مغطية المدن الكبيرة والمعالم الاساسية فيها. انشطة او مزارات كتيرة مالهاش حل تاني غير انك تعملها Tour مع شركة سياحة او تاخد تاكسي، وتكلفته طبعا غاليا في قبرص. لو عايز تعتمد على نفسك، تأجير عربية قد يكون حل بديل لعمل مزارات كتيرة وحلوة في البلد. خليني اقولكم على شوية نصايح تنفعكم في تأجير العربية في قبرص او اي بلد اوروبية تانية. وفي الآخر هقولكم ازاي تاخدوا عربية كبيرة بتخفيض ٥٠٪ وسعر بداية من ١٥ يورو في اليوم:

- العربيات في قبرص بتمشي على الشمال - يعني الاتجاه الرايح ماشي في الحارة الشمال، وبالتالي دريكسيون العربية على اليمين زي انجلترا واستراليا. يعني احتمالات اللخبطة موجودة بسبب تغيير الاتجاهات. هتحس انك سايق العربية جوه مراية، كل حاجة فيها معكوسة. دي كانت اول مرة في حياتي اسوق عربية دركسيون يمين واخدت شوية وقت بس علشان اخد على الوضع بتاعها. حد جرب السواقة في بلد الدريكسيون بتاعها على اليمين؟؟

- لازم تاخد بالك من اشارات المرور والسرعات المقررة والرادارات على الطرق السريعة. علشان المخالفة غالية وممكن تسبب ليك مشاكل. احيانا ممكن تلاقي عربية بوليس في الطريق واقفة على جنب وفيها ظابط بيشاور بكشاف على العربية بتاعتك، ودي معناها انه بيقولك اقف على جنب. لازم تركن على جنب اول ما تشوفه وتنتظر في سيارتك وتشوف سبب توقيفك ايه. مرتين حاولوا يوقفوني وانا مكنتش فاهم عايزين ايه وسيبتهم ومشيت … مكنتش لاقي القمع بتاع الكمين بتاعنا في مصر هاهاها ….. ربنا يستر وما البسش قضية كسر كمين شرطة على الطريق السريع. حد البوليس قفشه في اوروبا وهو سايق عربية؟؟

- لازم الي يأجر العربية باسمه هو الي يسوقها. يعني لو انتم ٥ صحاب هتأجروا عربية، ما يكنش فرح ابن العمدة بقى وكل واحد يسوق العربية شوية. لو البوليس قفشكم هتدفعوا غرامة كبيرة. وانتم بتعلموا عقد التآجير في شركة تأجير العربية ممكن تطلبوا اوبشن additional driver وتكتبوا اسماء المسموح لهم سواقة العربية. كل شركة ليا سياسة واسعار مختلفة للسواق الاضافي.

- ما تجريش / سوق بالراحة على الطريق اولا علشان الآمان ومخالفات السرعة وكمان تقلل من حرق البنزين. لتر البنزين ثمنه اكتر من ٢٥ جنية (١.٣ يورو). انا دفعت ٤٥ يورو بنزين في يومين سوقت فيهم ٣٣٠ كيلو فقط. التزم بسياسة البنزين مع شركة التأجير. اخدت العربية مفولة يبقى ترجعها مفولة.

- لما تيجي تأجر العربية، مش تحجزها من بدري اوي قبل سفرك. تأخر قدر المستطاع لانها عكس تذاكر الطيران، كل ما تنتظر كل ما هتلاقي last minute deals حلوة (عروض اللحظات الاخيرة). انا مثلا دورت اونلاين على محلات قبل يوم التأجير بيوم واحد ولقيت عرض لعربية ب١٥ يورو فقط في اليوم. حد لقى اونلاين عروض رخيصة لتأجير عربيات قيل كدة؟ لو سمحت اكتب اسم الموقع في كومنت.

- انا لقيت عربيتي على موقع البحث Orbitz وكانت شركة التأجير الارخص الي اخدت منها العربية شركة محلية قبرصية اسمها ACE / KEM Motors. استلمت العربية من مكتبهم في وسط البلد ورجعتها ليهم في نفس المكان. لو عربية من مكتب دولي زي Budget او Hertz هتكون اغلى علشان هتلاقي مكاتب ليهم في مناطق كتيرة في البلد الي انت فيها. ممكن مثلا تستلم العربية في وسط البلد وترجعها في المطار او العكس. طبعا بتكون سعرها اغلى لو pick up مختلف عن drop off.

- طبعا سعر ال١٥ يورو كان بدون التأمين. يعني لو خدشت العربية هتتعور في مئات اليوروهات. انا كنت واثق من نفسي واخدت المخاطرة واجرت بدون تأمين وربنا سترها. لكن الافضل لو انتم مجموعة انكم تاخدوا العربية بالتأمين علشان لا قدر الله حاجة تحصل، ما يبقاش موت وخراب ديار. التأمين غالبا ١٠ يورو في اليوم، لو اتقسم ثمنه عليكم هتكون بسيطة.

- لو اخدت العربية بدون تأمين، شركة التاجير هتحتاج بطاقة الائتمان بتاعتك تعمل عليها authorization لمبلغ تأمين تحت الحساب علشان لو حاجة حصلت في العربية. اخدوا الكريديت كارد وحجزوا مبلغ ٧٥٠ يورو. لم يخصموا المبلغ، حجزوه فقط. بعد ما رجعت العربية سليمة، اخدوا الكارت تاني وفكوا المبلغ المحجوز مرة اخرى على ماكينة الفيزا.

- احتمال كبير لما تطلب تأجير عربية صغيرة انك مش تلاقيها متوفرة ويتعملك upgrade مجاني لعربية اكبر بدون اي تكلفة اضافية.

حصلت معايا كتير في اكتر من بلد. المرة دي في قبرص لما لقيت اونلاين على موقع Orbitz عربية ب١٥ يورو قولت هاخدها وخلاص، ان شاء الله تكون بفردة كاوتش واحدة. لقيت مواصفاتها عربية hyundai i10 الصغيرة دي، مانيوال وبدون تكييف كمان. العربية الي بعدها كانت ب٣٠ يورو. قولت خلاص اتقشف واخد ارخص عربية وخلاص. روحت استلم العربية تاني يوم، لم اجد طبعا عندهم هذه العربية المزعومة وقالولي عملنالك upgrade ببلاش للعربية الاكبر، شيفروليه كروز كبيرة وواسعة وحلوة جدا. اعتقادي الشخصي ان العربية الرخيصة اوي دي مالهاش وجود عندهم اصلا. اعتقد انه بس بيجيبوا رجلك للموقع علشان يقولك عندنا عربيات من اول ١٥ يورو، وبيكتبوا المساوئ بتاعتها انها مانيوال وبدون تكييف علشان انت تخاف بقى وتدفع ال١٥ يورو الزيادة وتاخد العربية الاكبر والاريح. نصيحتي ليك، دائما اونلاين أجر العربية الصغيرة وعادة هتاخد upgrade وانت بتستلم. لو حظك وحش ومحصلش، اطلب upgrade للعربية في المكتب مقابل ٥ يورو في اليوم مثلا.

لو حد أجر عربية صغيرة قبل كدة وحصله free upgrade لعربية اكبر يا ريت يعرفنا تجربته.


التعليقات

مقالات أخري