English
English

تعرف ايه فوائد لبن الحمار

انا عمري ما عرفت ان الحمار ممكن يكون حيوان مهم كدة في حياة اي شعب زي ما شوفت في قبرص. يعتبر الحيوان الرسمي للبلد. التماثيل بتاعته في كل محلات الهدايا والاماكن السياحية. لو شتمت حد قولتله يا حمار مش هيزعل. الحمار القبرصي من الحيوانات القوية جدا وبتستحمل كتير اوي. لما رجعت في التاريخ شوية، لقيت ان الجيش الانجليزي اثناء حكمهم لجزرية قبرص في اوائل القرن العشرين، كان عندهم اكتر من ٢٣ الف حمار بيستخدموا في القوافل العسكرية الخاصة بالجيش وكانوا بيصدروهم لمصر والسودان وسوريا. ويعتبر ذو مكانة مقدسة لان صور رحلة العائلة المقدسة دائما ما تظهر السيد المسيح راكب على ضهر الحمار.

لما روحت قبرص لقيت ان من الحاجات المشهورة تتعمل هي زيارة مزرعة الحمير وسفاري الحمير. زرت مزرعة اسمها “الحمير الذهبية”، علشان اغلب الحمير الموجودة في المزرعة ذات لون ذهبي. المكان كبير وبيتم فيه تربية اكتر من ١٧٠ حمار وبيستخدموا في سفاراي الجبال. الاغرب بقى كان المنتجات المصنوعة من لبن الحمير. عندهم قسم خاص بإناث الحمير الامهات بيتحلبوا زي البقر كدة كل يوم علشان ياخدوا اللين بتاعهم.

نعم!!!!! لبن الحمير؟!؟!؟!؟!؟

طبعا انا صعقت من المعلومة واستفسرت اشمعنى يعني لبن الحمير؟؟ مالها البان البقر والمعيز؟؟

شرحوا لي في المزرعة ان العلم اثبت ان لبن أنثى الحمار يعتبر صحي ومفيد جدا لان القيمة الغذائية الموجودة فيه وتركيبته يخليه اقرب لبن للبن صدر الام، تخيلوا؟ طلع فيه فيتامين سي اكتر ٦٠ مرة من لبن البقرة. لبن الحمير مليان لاكتوز وكالسيوم ومعادن واحماض اوميجا ٣ الدهنية، وكمان قليل الدسم. يعني فيه كل الفوائد بدون دهون. طلع كمان مفيد في علاج الكثير من الامراض او الوقاية منها. لقيت في المزرعة منتجات غذائية كتيرة اوي مصنعة من لبن الحمير. شيكولاتة وايس كريم وحلويات ومشروبات. طبعا كان لازم اجربهم وطلع طعمهم حلو والله 🙂

العلم كمان اثبت ان لبن الحمير مفيد جدا للبشرة. لما رجعت للتاريخ، لقيت ان الملكة كليوبترا كانت بتستحمى بلبن الحمير يوميا علشان فوائده للبشرة ومحاربته للتجاعيد. لقيت بقى المحل مليان منتجات تجميلية من لبن الحمير. كريمات للبشرة وصابون ولوشن للجسم، وكلها عليها صورة الحمار منورة كدة :))

الواحد كل ما يسافر ويشوف بلاد جديدة بيتعلم حاجات غريبة فعلا … حد سمع عن لبن الحمير في حتة تانية وهو مسافر؟


التعليقات

مقالات أخري