English
English

اكثر بلد قصفت في تاريخ الحروب

للاسف هبدأ مقالاتي من دولة لاوس بقصة حزينة ومؤثرة جدا الصراحة. كلنا طبعا يسمع عن حرب فيتنام مع الامريكان في الخمسينات والستنيات، لكن محدش سمع عن حربهم مع لاوس خلال نفس الحرب.

حكومة لاوس اثناء الحرب كانت مؤيدة لفيتنام الشمالية لشيوعية في ذلك الوقت، وحيث ان دولة لاوس تشبه فيتنام على الخريطة لحد كبير وتشترك معها في الحدود من اقصى الشمال للجنوب، قامت بمساعدتهم للوصول الى الجنوب من خلال اراضيها. علشان التضاريس اللاوسية في الجنوب صعبة جدا ومليانة غابات وجبال، قام الطيران الامريكي بقصف لاوس باكثر من ١،٣٥٠،٠٠٠ صاروخ يحملوا اكتر من ٢٧٠ مليون قنبلة عنقودية، المحرمين دوليا لانهم للاسف يصيبوا المدنيين اكثر من العسكريين. الكمية المهولة من القنابل دي جعلت لاوس اكتر بلد تم قصفه في تاريخ البلاد بالنسبة لعدد سكانها الاقل من ٧ مليون.

للاسف لم تنتهي مأساة لاوس مع انتهاء الحرب لان اكثر من ٨٠ مليون قنبلة عنقودية (الواحدة في حجم البرتقالة) لم ينفجروا في الغابات لان الارض لم تكن صلبة بالشكل الكافي. للاسف القنابل الغير منفجرة دي (Unexploded Ordinances UXO ) تحولت لالغام فضلت تنفجر بعد انتهاء الحرب لحد يومنا هذا في المزارعين والاطفال الي في الحقول او الغابات. القنبلة ممكن تسبب الوفاة ولكن الاغلم بيفقد اطرافه السفلية. لما وصلت العاصمة اللاوسية “فينتيان" زرت مركز لاعادة تأهيل المتضريين والاطراف الصناعية COPE علشان افهم الموضوع اكتر.المكان بيحكي عن معاناة الشعب اللاوسي على مدى السنين الي فاتت وبيحكي عن المؤسسات الدولية الي عملت مجهودات كبيرة جدا على مدى السنين الي فاتت علشان ينضفوا المناطق المتضررة ويعملوا حملات توعية للاطفال والعائلات انها لا تقترب من اي اجسام معدنية غريبة وتقوم بالابلاغ عنها.

اغرب حاجة شوفتها في المكان هي “رجل صناعية للتجربة” محطوطة قدام مراية علشان الزوار يركبوها ويقدروا يشوفوا ويحسوا بححجم المعاناة الي ممكن واحد يعانيها لو فقد احدى اطرافه. انا شخصيا جسمي قشعر اول ما بصيت في المراية وحمدت ربنا على كل عقلة في صوابع رجلي.

للاسف لازالت بعض الدول الخسيسة بتستخدم القنابل العنقودية في حروبها ولم تمتثل لمطالبات المجتمع الدولي بالتوقف عن استخدامها لانها عشوائية في اصابتها وتتحول الى حقول الغام للابرياء بعد كدة.

عندنا في مصر ودول شمال افريقيا مشكلة مشابهة لما الالمان والانجليز زرعوا ملايين الالغام في الصحراء الغربية اثناء صراعهم في الحرب العالمية الثانية. لو حد عنده معلومات حديثة عن الموضوع ده ياريت يشاركها معانا.

(الناس الي ما تعرفش لاوس دي فين على الخريطة، هي دولة مغلقة في حجم المملكة المتحدة - تقع شمال تايلاند وجنوب الصين. هنزل عنها مقالات وفيديوهات حلوة كتير الفترة الجاية لانها طلعت مفاجأة فعلا.)


التعليقات

مقالات أخري