English
English

تعرف ايه عن الطيران التشارتر

كتير مننا بيسمع عن رحلات سياحية بتتعمل عن طريق طيران تشارتر، لكن كتير برضو ما يعرفوش عنها كتير. المقالة دي هتحاول تجاوب على جميع الأسئلة الخاصة بالطيارات التشارتر وازاي تقدروا تشتروا التذاكر بتاعتها.

يعني ايه طيارة تشارتر؟

طيارة التشارتر بتكون طيارة خاصة بيتم تأجيرهابالكامل من شركة طيران خاصة عن طريق شركة سياحة للافواج السياحية الخاصة بيها لتنفيذ برنامج رحلة سياحية. عدد ركاب الطائرة ممكن يبدأ من ٥٠ او ٩٠ الى اكتر من ٢٠٠ راكب كمان. الطيارات دي انواع واحجام وموديلات كتيرة على حسب حجم الجروب الي مسافر عليها.

طيارات آمان ؟

أنواع وأحجام الطيارات التشارتر ممكن تتراوح من ٥٠ راكب الى ٢٠٠ راكب او اكتر. معايير السلامة والآمان للطيران الدولي في المطارات كلها واحدة. يعني طيارة كبيرة زي الطيارة الصغيرة، طيارات منتظمة او طيارات تشارتر، بيتم التأكد من كل مقومات السلامة والامان فيها كل رحلة. بالرغم من وجود مئات الرحلات التشارتر اليومية في العالم كله هل سمعتوا عن حوادث طيران حصلت لاي طيارة علشان هي تشارتر. بالطبع لأ. كل شركات الطيران عندها تراخيص السلامة والآمان المطلوبة لتقديم خدمة الطيران. مش معنى انها طيران ارخص (زي الطيران الاوروبي يبدأ من ٥ يورو) يبقى معناها انه طيران مش آمان.

مريحة وعليها خدمات؟

طيارات التشارتر بتكون من نوع الطيران الاقتصادي، زي شركات الطيران الاقتصادي الاوروبية او الاسيوية، زي Easy Jet او Air Asia. بيتم تجريد الطيارات من اي كماليات ترفيهية علشان تكون رخيصة. مثلا الطائرات الخمسين راكب، الكراسي مش بترجع للخلف ومفيش شاشات تلفزيون او سماعات. بس لما تكون رحلة طيرانك ساعة ولا ساعتين، مش محتاج اي حاجة من الرفاهيات دي. لكن اكيد الطيارة مكيفة وفيها حمامات وطاقم خدمات لتقديم وجبات خفيفة او مشروبات.

بتطير في كل وقت؟

طيران التشارتر هو طيران غير منتظم وبيكون ليه جدول مواعيد خاص فقط بشركة السياحة الي مأجراها. يعني في مواسم الاجازات والاعياد مثلا تلاقي رحلات الى وجهات مختلفة. على العكس من الطيران المنتظم بيكون ليه جدول طيران معروف من قبل الرحلة بسنة.

بتطير من كل مكان والى كل مكان؟

طيران التشارتر بيحتاج موافقات من مطارات الوصول والمغادرة بحيث انه لا يضر شركات الطيران الدولية الوطنية صاحبة الرحلات المنتظمة. اغلب الوقت لازم طيران التشارتر يكون مختلف عن جدول طيران شركات الطيران المنتظمة سواء في مطار المغادرة او الوصول. عندك مثلا مصر للطيران بتروح كل يوم مطار لارناكا في قبرص. لكن علشان قبرص عندها مطارات اخرى غير لارناكا، تلاقي شركات سياحية بتعمل رحلات تشارتر من القاهرة عادي ولكن الى مطار بافوس - في غرب جزيرة قبرص.

ممكن نشتري تذكرة طيران تشارتر؟

قانونا، غير مسموح لشركات السياحة الي مأجره الطيارة انها تبيع تذكرة طيران فقط. لازم تبيع برنامج رحلة سياحية - package - شاملة الطيران والاقامة - علشان يتم حماية حقوق شركات الطيران الدولية اصحاب الطيران المنتظم. علشان كدة تذاكر الطيران التشارتر بتكون عادة غير متوفرة للبيع اونلاين على مواقع تذاكر الطيران.

لكن احيانا لما يكون الطلب على برنامج الرحلة السياحية منخفض، وخلاص الطيارة مسافرة وعليها بعض الكراسي الفاضية، بعض الشركات قبل السفر باسبوع او اكتر ممكن تبيع تذاكر طيران فقط لبعض العملاء بشكل مستتر - Last Minute Deal علشان تقلل خسارة الطيارة. يعني ما ينفعش ينزلوا اعلان يبيعوا فيه تذاكر طيران فقط. لو عايز تذكرة طيران تشارتر، محتاج تتواصل مباشر مع الشركات الي عندها رحلات تشارتر وتطلب تذكرة طيران.

*** تحديث وتوضيح ***

مفيش طيران تشارتر الى الدول الاسيوية البعيدة.

- مفيش محركات بحث بتطلع طيارات التشارتر المتوفرة علشان هي رحلات غير مدرجة للبيع المباشر للمستهلك.

- لما تلاقي شركة سياحة عاملة رحلات تشارتر الى وجهات قريبة (مثلا تركيا - قبرص - لبنان)، ممكن تتواصل مع الشركة بشكل مباشر وتسأل عن شراء تذاكر طيران فقط بدون باقة فندق وطيران.

- الطيران الرخيص المتوفر اونلاين من مطارات الغردقة وشرم الشيخ الى بلاد اوروبية، يعتبر طيران منتظم وممطن شراءه من موقع شركة الطيران.

 


التعليقات

مقالات أخري