English
English

جبال الالب الالبانية

اولا يا جماعة جبال الالب الي موجودة في اوروبا بين المانيا وسويسرا وفرنسا والنمسا … مالهاش علاقة جغرافيا بجبال الالب الالبانية، ولكن المشترك بينهم المناظر الطبيعية الجميلة للجبال والخضرة والقرى.... اتفرجوا على الصور الاول وبعدين كملوا قراية 😍.

زي ما احنا بنقول عن زنزبار هي مالديف افريقيا، وبنقول عن مرسى علم مالديف مصر، هم كمان بيقولوا عن الجبال بتاعتهم جبال الالب

طيب هي فين بقى ونروحها ازاي؟

اشهر قرية هي Theth في قلب وادي ومحاطة بالجبال وفيها منازل وguesthouses صغيرة وجميلة جدا. تبعد حوالي 6 ساعات من تيرانا، وتبعد من شكودرا 75 كم ولكن بيحتاجوا 3 ساعات. لا تصدقوا google maps في حساب توقيت المسافات في الطرق الجبلية.

اثناء اقامتي في شكودرا، لقيت ان في طريقتين نروح بيهم theth:

• عربية دفع رباعي بالسواق بتاعها وبياخد حوالي 110-120 يورو في اليوم. بياخدك الصبح بدري ويلففك في مزارات القرية وتعمل ال hike بتاعتها وترجع في نفس اليوم الى شكودرا قبل الدنيا ما تليل عليكم في الطريق. مرهج شوية انك تعملها في يوم واحد.

• او تاخد ميكروباص توصيلة رايح فقط الفرد ب10 يورو علشان يوصلك القرية ومن هناك تنطلق تعمل المزارات بتاعتك مشيا على الاقدام (مزارات بعيدة عن بعض) - غالبا الناس الي بتروح بالميكروباص بتقعد يومين تلاتة في القرية او تعمل رحلة للوصول الى Valbona.

• لو مأجر عربية من تيرانا، اوعى تحاول تروح بيها لان الطريق وحش جدا في الثلث الاخير ولو معاك عربية غير دفع رباعي هيكون في مشاكل محتملة كتير. غالبا شركة الايجار هتوقفلك العربية لانهم بيعملوا tracking بالGPS علشان لو خرجت بره نطاق المسموح

الاقامة في القرية عبارة عن guesthouses فقط. صغيرة وحلوة بالتصميم السويسري الاوروبي الجميل. تقريبا مفيش مطاعم في القرية الا في الفنادق والجيست هاوس. علشان كدة انصحك تاخد الاقامة full board معاهم.

بس هتاكل اكل اورجانيك جدا على رأي الفنان سيد رجب هاهاهاهاها

اهم المزارات في Theth

• شلالات على الطريق وانت ماشي بتشوفها وعالة وجميلة جدا وكذا view point للوادي من الاعلى

• ثلوج متجمدة glaciar ستايل كدة - موجودة في الصيف والجو حلو

• كنيسة القرية الاساسية في نص القرية - كانت مستشفى ولادة وقت الشيوعية

• برج الحبس - lock up tower - وده برج علشان يلجأ اليه الناس الي عليها طار طلبا للحماية - شمال البانيا عامل زي الصعيد عندنا في مصر قديما وعندهم زمان حوار الطار وسلسال الدم blood feud

• شلال Grunas وبيحتاج hiking ساعتين رايح جاي

• واخيرا ال blue eye وبتحتاج ساعتين ثلاثة رايح جاي - 5 كم

رحلة Theth من الحاجات المهمة جدا الي لازم تعملوها في زيارتكم الجاية الى البانيا لو بتحبوا الطبيعة والجبال وال hiking - بس لازم تكونوا عارفين انها مغامرة متعبة شوية في الوصول اليها ولكن بكل تأكيد تستحق مشقة الوصول بتاعتها.


التعليقات

مقالات أخري