لية قررت أسافر أيسلندا كل سنة ؟
من أكتر من 6 سنين، قررت أسافر أيسلندا لأول مرة، ومن ساعتها وأنا بزورها كل سنة. الرحلة دي بدأت من أكتر من 12 سنة لما كنت بتفرج على فيلم وثائقي على قناة National Geographic وشوفت حاجة خلتني مش مصدق عيني. ألوان خضراء، أرجوانية، زرقاء وحمراء بتتراقص في السماء! افتكرت في الأول إن ده فيلم خيال علمي أو مشهد في فيلم، لكن اكتشفت إنه حقيقي.
الظاهرة دي اسمها الشفق القطبي أو Northern Lights، وهي كانت السبب الرئيسي لزيارتي الأولى لأيسلندا. فضلت أتابع وثائقيات وأبحث عنها لحد ما قررت أحقق الحلم ده وأشوفها بعيني في أيسلندا.
إيه هو الشفق القطبي؟
الشفق القطبي هو ظاهرة طبيعية بتحصل في المناطق القطبية الشمالية بسبب تفاعل الرياح الشمسية مع المجال المغناطيسي للأرض. لما الرياح دي بتعبر الأقطاب، بتنتج ألوان مبهرة بتزين السماء وبتخطف القلوب.
إزاي تشوف الشفق القطبي؟
علشان تشوف الشفق القطبي، في عوامل لازم تاخد بالك منها:
المكان: أفضل الأماكن لرؤية الشفق القطبي بتكون في الدول القريبة من القطب الشمالي زي أيسلندا، النرويج، السويد، وفنلندا.
الوقت: الظاهرة بتحصل طول السنة، لكن رؤيتها ممكنة في الظلام الكامل بين منتصف سبتمبر ومنتصف أبريل.
النشاط: قوة الشفق بتتحدد بمؤشر من 1 لـ 10، وأفضل رؤية بتكون لما المؤشر يبقى فوق 4 أو 5.
الطقس: السماء لازم تكون صافية، لأن السحب بتمنع رؤية الشفق تمامًا.
أيسلندا.. أكتر من مجرد شفق قطبي
على الرغم إن الشفق القطبي كان السبب الرئيسي لزيارتي الأولى، اكتشفت إن أيسلندا هي بلد استثنائية في كل حاجة:
الجبال، الأنهار الجليدية، والبراكين اللي كأنها من كوكب تاني.
الشلالات، البحيرات، والينابيع الساخنة اللي تخطف الأنفاس.
الشواطئ السوداء والصخور البركانية اللي مش موجودة في أي مكان تاني.
حتى لو زرت أيسلندا في الصيف وما شوفتش الشفق القطبي، هتستمتع بأجمل مناظر طبيعية في العالم، وده السبب اللي خلاني ما أزهقش من زيارتها كل سنة.
رحلتك لأيسلندا
خطط رحلتك لأيسلندا النهاردة واستمتع بجمالها اللي ملوش زي. سواء علشان تشوف الشفق القطبي أو تستكشف طبيعتها المبهرة، أيسلندا هتفضل من أجمل الذكريات اللي هتعيشها.
English 
Arabic